ကမ္ဘာဦးစကားလုံးများနှင့် ​ဝေါဟာရများ

၁၂ ။ ကမ္ဘာဦးစကားလုံးများနှင့် ဝေါဟာရများ
-----
“ ကျွန်တော်တို့ ယနေ့ ပြောဆိုသုံးစွဲနေကြသည့်စကား သို့မဟုတ် ဘာသာစကားတို့မှာ သားရိုင်းတိရစ္ဆာန်များ အော်ဟစ်မြည်ကြွေးသံထက် အနည်းငယ် မျှသာ သာယာနာပျော်ဖွယ်ရှိသည် ” ဟု အမေရိကန် ကဗျာဆရာကြီး ဟော်သွန် ဆိုသူက ပြောခဲ့ဖူးသည် ။

သို့ရာတွင် ကျွန်တော်တို့ နေ့စဉ်ပြောဆိုသုံးစွဲနေသည့် စကားလုံးများ မည်သို့ ဖြစ်ပေါ်လာသည်ကို ခြေခြေမြစ်မြစ်သိသူ မရှိဟု ဆိုရမည် ။ ဤကိစ္စ နှင့်ပတ်သက်၍ မှန်းဆချက် အမျိုးမျိုးသာ ပေါ်ထွက်ခဲ့သည် ။

ဟော်သွန်၏ အဆိုအမိန့်ကို “ ဝုတ်ဝုတ် ” သဘောတရားဟု ခေါ်ကြ သည် ။

ခွေးတစ်ကောင် ဟောင်သည် ဆိုကြပါစို့ ။ သူ၏ ဟောင်သံသည် “ ဝုတ်ဝုတ် ” ဖြစ်သည် ။ ထိုအခါ လူက ခွေးကို “ ဝုတ်ဝုတ် ” ဟု ခေါ်သည် ။ သို့ရာတွင် ဤအယူ၌လည်း အခက်တစ်ခု တွေ့ရပြန်သည် ။

ကျွန်တော်တို့ မြန်မာနား၌ ကြားရသော သေနတ်သံမှာ “ ဒိုင်း ” ဟူ၍ ဖြစ်ငြားလည်း အင်္ဂလိပ် တစ်ယောက်၏ နားတွင်မူ “ ဗန်း ” ဟုသာ ကြားရသည် ။

“ ဒင်ဒေါင် ” မည်သော အခြားသဘောတရားတစ်ခု ရှိသေးသည် ။ ယင်း မှာ ဘုရားသခင် မိန့်ဆိုသမျှ အသံကို အနက်အဓိပ္ပာယ် ဖော်ပေးသည့် ဆက်သွယ်မှုတစ်ခု ရှိသည်ဆိုသည့် သဘောတရားပင်ဖြစ်သည် ။

ထာဝရဘုရားသခင် ရှိသလား ၊ မရှိဘူးလား ဆိုသည့် ပြဿနာမှာ ရေရာသေချာလှသည် မဟုတ်ရကား ယင်းနှင့် ပတ်သက်၍ အထူးဆိုဖွယ် မရှိတော့ပြီ ။

အခြား သဘောတရားတစ်ခုမှာ ဘာသာစကားဟူသည် အံ့သြခြင်း ၊ ကြောက်လန့်ခြင်း ၊ ဝမ်းသာခြင်း ၊ နာကျင်ခြင်းတို့ကြောင့် အော်ဟစ်ရာမှ ပေါ်ပေါက်လာသည် ဟူ၍ဖြစ်သည် ။ ဤသဘောသည် ' ယိုဟီးဟို´ဟု ခေါ် သည့် သဘောနှင့် နီးစပ်သည် ။

“ ယိုဟီးဟို ” သဘောတရားအရဆိုလျှင် လူတို့ သည် အလေးအပင်ကို မ သည့်အခါ အော်ဟစ်ကာ ညာသံပေးသည် ။ ဤ သည်မှ စကားလုံးများဖြစ်လာသည်ဟု ဆိုသည် ။

“ ယိုဟီဟို ” သဘောတရားသည် “ သီချင်းဆို ” သည့် သဘောတရားနှင့် နီးစပ်သည် ။ ယင်းမှာ လူတို့သည် အမဲလိုက်ဇာတ်တိုက်ရာတွင် ဂါထာမန္တရား များ ရွတ်ဖတ်ရာမှ ဘာသာစကား ဖြစ်လာသည် ဟူ၏ ။

ထို့ပြင် ဘာသာစကားဟူသည် သဘာဝတရားတစ်ခုပင် ဖြစ်သည် ။ အလိုအလျောက် ပေါ်လာသည် ဟူသော အယူ ၊ တစ်ဖန် ဘာသာစကား ဆိုသည်မှာ မုသားပြောရန် တီထွင်ရာမှ ဖြစ်ပေါ်လာသည့် အလေ့အထတစ်ခု ပင် ဖြစ်သည်ဟူသော အယူတို့လည်း ရှိသေးသည် ။

သို့ရာတွင် မုချမှန်ကန်ချက် တစ်ခုကားရှိသည် ။ ယင်းမှာ ဘာသာ စကားသည် နေရာအမျိုးမျိုး ၊ ဒေသအမျိုးမျိုးတွင် ခေတ်အဆက်ဆက် ပြောင်း လဲနေသည်ဆိုသည့် အချက်ပင်ဖြစ်သည် ။

' သမင်က ဟောက် ၊ ဂျီကတောက် ၍ ၊ မျောက်ကကြိုးခွေ ၊ ဒေါင်းအိုးဝေ ” စဉ် လူသည်လည်း ခေတ်အဆက်ဆက် ကျော်လွှားရင်း စကားပြောဆိုပုံ ပြောင်းလဲလာခဲ့သည် ။

ဤသည်မှာ ဘာသာ စကားဟူသည် လူ၏ ပြုမူလှုပ်ရှားပုံကို ဖော်ပြသည့် ကိစ္စပင်ဖြစ်သောကြောင့်တည်း ။

လူတို့၏ အပြုအမူ အနေအထိုင်တို့သည် ခေတ်အဆက်ဆက်တွင် ပြောင်းလဲလာခဲ့ရာ ဘာသာစကားသည်လည်း ပြောင်းလဲလာခဲ့ရသည် ။

လူတို့ သည် တစ်နေရာတည်းတွင် နေထိုင်သည့်အခါ အပြောင်းအလဲ နည်းပါးသည်ကို တွေ့ရသည် ။ သို့ရာတွင် တစ်နေရာမှ အခြားဒေသများသို့ ခြေသလုံး အိမ်တိုင် လှည့်လည်သည့်အခါ စကားလုံးသစ်များ ၊ ဝေါဟာရသစ်များ ၊ ပြော နည်းအသစ်များကို တွေ့လာရသည် ။

ကာလရွေ့လျောလာသည်နှင့်အမျှ ​​ဝေါဟာရတို့၏ အနက်အဓိပ္ပာယ်သည်လည်း သိသိသာသာပင် ပြောင်းလဲလာ ရသည် ။

ပုံစံဆိုလျှင် အိန္ဒိယတိုင်းသားတို့သည် သက္ကတဘာသာကို ရှေးက ပြောခဲ့သည်ဆိုသော်လည်း ယခုအခါ ယင်းဘာသာကို နားမလည်တော့ဘဲ ဟိန္ဒူစတန်နီကိုသာ ပြောကြသည် ။

ကျွန်တော်တို့ မြန်မာများသည် က ပါဠိနှင့် မြန်မာစကားကို ပြောခဲ့သော်လည်း ယခုအခါ မြန်မာမဆန် အင်္ဂလိပ်တစ်ဝက် ၊ မြန်မာတစ်ဝက် စကားကို ပြောနေကြပြီ ။

ပုံစံဆိုရလျှင် အစည်းအဝေးထိုင်သည်ဟူသော အသုံးအနှုန်း ၊ စားမေးပွဲထိုင်သည်ဆို​သော အသုံးအနှုန်းတို့ဖြစ်သည် ။

ရှေးအကျဆုံး လူ့အနွယ်တို့ သီချင်းသီဆိုရာမှလည်းကောင်း ၊ ​အော်ဟစ်မြည်တမ်းရာမှလည်းကောင်း စကားလုံးများ ဖြစ်ပေါ်လာသည်ဟူသော အဆိုအမိန့်ကို လက်ခံသည် ဆိုသည့်တိုင်အောင်ပင် ဘာသာစကားစစ်စစ် မည်သည့်အချိန်က ပေါ်လာသည်ကို ကျွန်တော်တို့ သေချာစွာ မပြောနိုင်သေး ။

ပြောစကားကို စာအဖြစ် အရေးအသား အက္ခရာမတင်မီ နှစ်ပေါင်း ထောင် ပေါင်းများစွာ ကြာသည့် ကာလကပင် ပြောဆိုနေကြပြီ ဟုသာ အကြမ်း အားဖြင့် မှတ်ယူရန် ရှိလေသည် ။

တိုက်ဂရစ် မြစ်ဝှမ်းဒေသနှင့် ယူဖရေးတိ မြစ်ဝှမ်းဒေသ အကြားတွင် တည်ရှိသော မိုဟင်ဂျိုဒါရိုမြို့တော်၌လည်းကောင်း ၊ ဆူမားရီးယား၌ လည်းကောင်း ဘာသာစကား ပေါ်နေပြီဟူသည့် အဦးဆုံး အထောက်အထားတို့ကို တွေ့ရသည် ။ ဤယဉ်ကျေးမှု နှစ်ခေတ်မှာ တစ်နည်းတစ်ဖုံ ဆက်သွယ်နေသော ယဉ်ကျေးမှုကြီးများ ဖြစ်ကြသည် ။

လွန်ခဲ့သည့်နှစ်ပေါင်း လေးထောင် လောက်က ပေါ်ထွန်းခဲ့ခြင်း ဖြစ်သည် ။ ထို့နောက် ခရစ်မပေါ်မီ အနှစ် ၃ဝဝဝ ခန့်က ဘေဘီလုံမြို့သားတို့ နှင့် ဆီးရီးယန်းတို့ ပြောဆို သုံးစွဲသည့် ဘာသာစကား အထောက်အထား တို့ကို တွေ့ရပြန်သည် ။

ထို့နောက် ခရစ်မပေါ်မီ နှစ်ပေါင်း ၂၀၀၀ တွင် အီဂျစ်ပြည်နှင့် တရုတ်ပြည်တို့၌ စာပေအရေးအသားတို့ကို တွေ့ရသည် ။ ယင်းတို့နောက်တွင်ကား အထောက်အထားတို့ များပြားလာသည် ။ တဆက်တစပ်တည်းရှိလာသည် ။

ထိုအခါကစ၍ အရင်းခံဘာသာစကားကြီး များမှ အစွယ်အပွား ဘာသာစကား အမျိုးမျိုးတို့ ပေါက်ဖွားလာပုံကို သိရှိ လာရသည် ။

#htoohtoolay