မယာလူမျိုးတို့၏ နတ်ဘုရားများနှင့် သူတို့၏ ယုံကြည်မှု

မယာလူမျိုးတို့၏ နတ်ဘုရားများနှင့် သူတို့၏ ယုံကြည်မှု

-----

မာယာလူမျိုးများသည် သဘာဝနတ်ဘုရားများကို ကိုးကွယ်ကြသည် ။ ၎င်းတို့ထဲ၌ အရေးကြီးသော ဘုရားမှာ Itzamna ဘုရားဖြစ်သည် ။ သူသည် ကမ္ဘာမြေကို ဖန်ဆင်းသော မီးနတ်ဘုရားဖြစ်သည် ။ သူသည် ကောင်းကင်ကို နေ့ရောညပါ အုပ်ချုပ်လျက် မာယာတို့က သူတို့အတွက် ပြကဒိန်ကို ၎င်းက ဖန်တီးပေးသည်ဟု ယုံကြည်ကြသည် ။ သူ့အမည်၏ အဓိပ္ပာယ်မှာ “ အိမ်မြောင်အိမ် ” ဟု သိရသည် ။

နောက်ထပ် နတ်ဘုရားတစ်ပါးမှာ Kukulkan ဟုခေါ်သော မြွေနတ်ဘုရားဖြစ်ကာ သူ့အား မြွေဆိုးဟု အဓိပ္ပာယ်ရသော အမည်ကို ပေးထားကြ၏ ။ သူသည် နောက်ပိုင်း၌ မာယာလူမျိုးများအတွက် အဓိက အရေးပါသော နတ်ဘုရားတစ်ပါး ဖြစ်လာကာ နဂါးနှင့် သူ၏ ရုပ်ထုကို ပုံဖော်လာကြ၏ ။

နောက်နတ်ဘုရားမှာ Bolon Tzacab ဖြစ်သည် ။ သူသည် မုန်တိုင်းနှင့် လေကြီးမိုးကြီးဖြစ်ပေါ်စေကြောင်း ဘုရားဖြစ်သည် ။ မာယာ ဒဏ္ဏာရီလာအရ မာယာလူမျိုးများသည် သူတို့၏ နတ်ဘုရားများကို စိတ်ဆိုးစေမည့် အပြုအမူများ လုပ်မိကြသောအခါ ၎င်း နတ်ဘုရားသည် လေကြီး ၊ မိုးကြီးများ ဖြစ်ပေါ်စေလျက် မာယာလူမျိုးများအပေါ် အမြက်ဒေါသ ထွက်လာသည်ဟု ဆို၏ ။ သူ့ကို ခြေထောက်တစ်ချောင်းဟု အဓိပ္ပာယ်ရသော အမည် ပေးထားသည် ။

မိုးရေနှင့် မိုးကြိုးကို အုပ်စိုးသော နတ်ဘုရားလည်း ရှိသေးသည် ။ သူ့အား မာယာလူမျိုးများက Chaac ဟု ခေါ်ကြ၍ သူ့တွင် လင်းလတ်နေသော ပုဆိန်ရှိကာ ထိုပုဆိန်ဖြင့် မိုးတိမ်နှင့် မိုးများကို ဖြစ်ပေါ်စေသည်ဟု ယုံကြည်ကြ၏ ။

မာယာလူမျိုးများ၏ ဘုရင်များမှာ လူသားနှင့် ဘုရားအကြားမှ တမန်တော်များ ဖြစ်ကြကာ နတ်ဘုရားများနှင့်ပတ်သတ်သော လုပ်ငန်းဆောင်တာများကို ၎င်းတို့က လုပ်ဆောင်ပေးရလေသည် ။ တစ်နည်းအားဖြင့်ဆိုလျှင်မူ ၎င်းတို့သည် သက်ရှိထင်ရှားရှိသော နတ်ဘုရားများဟု မိမိကိုယ်ကို ခေါ်ဆိုကြ၏ ။

ဘုရင်များပြီးလျှင် ယဇ်ပရောဟိတ်များလည်း ရှိသေး၏ ။ သူတို့၏တာဝန်မှာ လူသားများအား နတ်ဘုရားများက မျက်နှာသာပေးမှုကို ခံရစေရန်အတွက် ထုံးတမ်းစဉ်လာများကို လုပ်ဆောင်ရန်အတွက်သာ ဖြစ်သည် ။ တစ်နည်းဆိုရသော် ဘာသာရေး ခေါင်းဆောင်များ နည်းတူဖြစ်၏ ။ မာယာများမှာ ၎င်းတို့အား ရိုသေလေးစားရ၏ ။ ထိုသူတို့၏ လုပ်ငန်းဆောင်တာအသေးစိတ်ကို သူတို့၏ယဇ်ပရောဟိတ်စာအုပ်တွင်  ဖော်ပြထားသည်ဟု ဆိုသည် ။ သူတို့၏ အချို့တာဝန်များလည်း ရှိသေးသည် ။ ၎င်းတာဝန်များမှာ -

- နတ်ဘုရားများအဖြင့် အယောင်ဆောင်ခြင်း၊

- အနာဂတ်ကို ခန့်မှန်းရခြင်း ၊

- အံ့ဖွယ်အမှုများပြုလုပ်ပြရခြင်း ၊

- နေကြတ်ရာ၌ ပွဲတော်စီမံရခြင်း ၊

- ငတ်မွတ်ခေါင်းပါးခြင်း၊ မိုးခေါင်ခြင်း၊ ကပ်ရောဂါနှင့်မြေငလျင်များကို နတ်ဘုရားအား တိုင်တည်၍ ကာကွယ်ရခြင်း ၊

- တိုင်းပြည်အတွက် လုံလောက်သောမိုးရေချိန်ကို ရရှိရပါမည်ဟု အာမခံနိုင်ရခြင်း တို့ဖြစ်သည် ။

နောင်ဘဝနှင့် ပတ်သတ်၍ မာယာလူမျိုးတို့၏ အယူအဆမှာ အလွန်ကြောက်မက်ဖွယ်ကောင်းသော အမှောင်ထုကြီးသည် ရှိ၏ ။  လူများသည် သေလွန်သောအခါ ၎င်းအမှောင်ထုအတွင်းကို ဖြတ်သန်းသွားရမည် ။ ထိုအမှောင်ထုအတွင်းဤ အမှောင်နတ်ဘုရားများ ရှိနေသည် ။ သူတို့က ရောက်လာသော သေလူများကို ညဉ်းပန်းနှိမ်စက်ကြ၏ ။ ဤကဲ့သို့ နောက်ဘဝသည် အထင်အရှားရှိနေသည် ။ ထိုသို့ ကြောက်မက်ဖွယ်ကောင်းသော အမှောင်ထုအတွင်းသို့ သေလူများအားလုံး ဖြတ်သန်းသွားရမည်ဖြစ်သည် ။ သို့သော် ကလေးငယ်များ နှင့် ကလေးမွေးဖွားစဉ် သေဆုံးသွားရသော အမျိုးသမီးများ ၊ ယဇ်ပူဇော်ခံရသူများသည် ၎င်း အမှောင်ထုကို ဖြတ်သန်းရမည်မဟုတ်ပဲ ကောင်းကင်သို့ တိုက်ရိုက်သွားရမည်ဟု ယုံကြည်ကြသည် ။

မာယာလူမျိုးဟူ၍ ကမ္ဘာက သိရှိရသော အကြောင်းအရာတစ်ချက်မှာ သူတို့၏ ပြကဒိန်သည် အလွန်အရေးပါသော အခန်းကဏ္ဏတစ်ခု၌ တည်နေ၏ ။ အချို့နေ့များကို ကံကောင်းစေသော နေ့များအဖြင့် သတ်မှတ်စေပြီး အခြားရက်များကို ကံဆိုးစေသည့် ရက်များအဖြင့် ပုံဖော်ထားခဲ့ပြန်သည် ။ သူတို့၏ ဘာသာရေး အခမ်းအနားနှင့် ပွဲတော်ရက်များကို ၎င်းပြကဒိန်ဖြင့် သတ်မှတ်ကြသည် ။ ယင်းတို့အသုံးပြုသော ပြကဒိန်မှာ ဂြိုလ်ပတ်လမ်းများအား သိပ္ပံနည်းကျအတိုင်း အတိအကျ ဖော်ပြနိုင်ခြင်းကြောင့် တစ်မူထူးခြားလျက် ရှိနေရ၏ ။

၎င်းတို့သည် အီဂျစ်ကဲ့သို့ ပိရိမစ်များကိုလည်း တည်ဆောက်ခဲ့ကြသည် ။ မာယာပိရိမစ်များမှာ သူတို့နတ်ဘုရားများ၏ အထိမ်းအမှတ်ကို ရည်စူးတည်ဆောက်ထားခြင်းဖြစ်သည် ။ ပိရိမစ်၏ ထိပ်ပိုင်းတွင် ဗိမ္မာန်တော်အတွက် နေရာတစ်ခုရှိ၏ ။ ယဇ်ပရောဟိတ်များသည် နှစ်ဖက်စလုံးမှ လှေကားများကိုအသုံးပြုကာ ပိရိမစ်၏ ထိပ်သို့ တက်ကြသည် ။ သူတို့သည် ဝတ်ပြုခြင်းနှင့် ကိုးကွယ်ခြင်း ၊ ယဇ်ပူဇော်ခြင်းများကို ၎င်းထိပ်ဆုံးရှိ ဝတ်ပြုရာ ဗိမ္မာန်အတွင်း၌ ပြုလုပ်ကြလေ၏ ။

မာယာလူမျိုးတို့သည် ကမ္ဘာကြီးကို ဘီစီ ၃၁၁၄ တွင် ဖန်ဆင်းခဲ့သည်ဟု ယုံကြည်ကြသည် ။ ဤသည်က ၎င်းတို့ပြကဒိန်အတွက် သုညရက်စွဲ ဖြစ်ခဲ့သည် ။ မာယာဘာသာ၏ အချို့သွင်ပြင်ပညာရပ်များကို ယနေ့ထက်တိုင် ကမ္ဘာအရပ်ရပ်၌ ကျင့်သုံးနေကြစဲဖြစ်သည် ။ သူတို့သည် လူသားများအား ပြောင်းဖူးဖြင့် ပြုလုပ်ခဲ့ကြသည်ဟု ဆိုသည် ။ ထိုဇာတ်လမ်း၌ နတ်ဘုရား ၆ ပါးသည် ပြောင်းဖြစ် လူသားများမဖန်တီးမီ၌ သစ်သား ၊ မြေကြီး စသည်တို့ဖြင့် အမျိုးမျိုး ပုံဖော်ခဲ့သည်ဟု ဆို၏ ။ သို့သော် စိတ်တိုင်းမကျရကား နောက်ဆုံး၌ ပြောင်း အဖြူနှင့် အဝါကို အသုံးပြုကာ လူသားတစ်စုံကို ဖန်တီးရာမှ စိတ်တိုင်းကျခဲ့သည်ဟု ဆိုကြ၏ ။ ထို့ကြောင့် မာယာလူမျိုးများအတွက် လူသားတို့၏ အစပထမ ဘိုးဘွားဘီဘင်များမှာ ပြောင်းဖူးများ ဖြစ်ကြသည်ဟု ယုံကြည်ကြ၏ ။ ပြောင်းဖူးသည် ကျွန်ုပ်တို့အတွက် မြင့်မြတ်သောအရာဖြစ်၍ ကျွန်ုပ်တို့၏ ဘိုးဘေးများနှင့် ဆက်နွယ်နေသည်ဟု သိထားရမည်ဆို၏ ။ ပြောင်းဖူးသည် ၎င်းတို့၏ ရှင်သန်ရာပင် ဖြစ်လေတော့သည် ။ မာယာပြကဒိန်၌ ၂၀၁၂ ခုနှစ်၊ ဒီဇင်ဘာ ၂၁ ရက်နေ့တွင် သဘာဝဘေးအန္တာရာယ်များ ကျရောက်မည်ဟု ဖော်ပြပါရှိထားခဲ့သည် ။

#htoohtoolay